ഓം നമ:ശിവായ

എന്റെ നാട്ടില്‍ അപ്രതീക്ഷിതമായാണ് പ്രശ്നങ്ങള്‍ ഉണ്ടാവുന്നത് . ഉദാഹരണം - ബീഡി വലിച്ചു പുക വിടുമ്പോള്‍ ആരുടെയെങ്കിലും മുഖത്ത് നോക്കിയാണെങ്കില്‍ നോക്കപ്പെടുന്നയാളിനു അഭിമാനക്ഷതം ഏല്‍ക്കും. ആ നോട്ടത്തിനു കാരണം അവന്റെയും എന്റെയും കൊടിയുടെ നിറവ്യത്യാസമല്ലേ എന്ന് വെറുതെ ഒരു ചിന്ത ..! ഒന്ന് ചോദിച്ചാലോ എന്ന ഒരു ധീരോദാത്തമായ ആലോചന ..!! ഒരു ബീഡി വലിച്ചുകൊണ്ട് പുക അവന്റെ മുഖത്ത് ഊതിക്കൊണ്ടു ചോദിക്കും  - "വീട്ടില്‍നിന്നു വരുമ്പോ തിരിച്ച് ചെല്ലും എന്ന് അമ്മയോട് പറഞ്ഞുതന്നെയാണോടാ ഇറങ്ങിയത്‌ ?".

അങ്ങനെ എന്തോ , ആരോ , എവിടെയോ മുള്ളി എന്നോ നുള്ളി എന്നോ പറഞ്ഞു രാവിലെ പത്തുമണി സമയത്ത് ഒരു പ്രശ്നം നടന്നു. പരിണിതഫലമായി ഒരു ഇരു ചക്ര വാഹനം അഗ്നിക്കിരയാക്കപ്പെട്ടു. ഉടനെ തന്നെ പോലീസ് ഇടപെട്ടു സംഭവസ്ഥലം ശാന്തമാക്കി. രാവിലെ കുട്ടികളെ സ്കൂളില്‍ പറഞ്ഞുവിട്ട അമ്മമാര്‍ ആധിയോടെ അന്വേഷിക്കുന്നുണ്ടായിരുന്നു  വൈകുന്നേരം സ്കൂള്‍ ബസ്സ്‌ വരുമോ ? പിന്നീട് പ്രശ്നങ്ങള്‍ ഒന്നും ഉണ്ടായില്ലല്ലോ എന്നൊക്കെ. പിന്നീട് പ്രശ്നങ്ങള്‍ ഒന്നും ഉണ്ടായില്ല , പല സ്കൂളുകളില്‍നിന്നും വാഹനങ്ങള്‍ കുട്ടികളെ കൊണ്ടുപോയതുപോലെ തന്നെ കൊണ്ടുവരികയും ചെയ്തു .

പ്രശ്നം ഒതുങ്ങിയ സാഹചര്യത്തില്‍ ഉണ്ടായ പ്രശ്നങ്ങളെ പറ്റി ചര്‍ച്ച ചെയ്യാനും സര്‍ക്കാരിനെയും പോലീസിനെയും ഭരണഘടനയും കുറ്റം പറയാനും വേണ്ടി ചര്‍ച്ചയില്‍ അവിഭാജ്യ ഘടകമായ ഒരു പ്രത്യേക തരം പാനീയം അന്വേഷിച്ചു ഞാനും എന്റെ ഒരു സുഹൃത്തും ഇറങ്ങി. ഞങ്ങളുടെ ചിന്ത കാട് കയറുന്നതിനു മുമ്പേ അടുത്ത വീട്ടില്‍  നിന്നും  ഒരു ചേച്ചി വിളിച്ചു ചോദിച്ചു 

"സജൂ ... അതുലിന്റെ സ്കൂള്‍ ബസ്സ്‌ വന്നില്ല സ്കൂളില്‍നിന്നു ഹെഡ് മിസ്ട്രസ്സ് വിളിച്ചു പറഞ്ഞു കുട്ടിയെ വന്നു പിക്ക് ചെയ്യാന്‍ . നിങ്ങളെവിടെയാ പോകുന്നത് ? എന്റെ മോനെ ഒന്ന് പോയി കൂട്ടിക്കൊണ്ടു വരുമോ ?" 

ശെടാ ... പണിയായല്ലോ ..! ഞാന്‍ മനസ്സിലോര്‍ത്തു .

" പക്ഷെ ചേച്ചീ എല്ലാ സ്കൂല്‍ബസ്സും വന്നല്ലോ .... അതുലിന്റെ സ്കൂള്‍ ഏതാ? " ഞാന്‍ ചോദിച്ചു.

"അമൃത സ്കൂള്‍ . അവരിപ്പോ വിളിച്ചതെയുള്ള് . ഞാന്‍ അവരോടു പറഞ്ഞു ഇവിടെ പ്രശ്നം ഒന്നും ഇല്ല, ബാക്കിയെല്ലാ സ്കൂളില്‍ നിന്നും വണ്ടികള്‍ വരുന്നുണ്ട് എന്നൊക്കെ. അവര്‍ക്കതോന്നും കേള്‍ക്കണ്ട .. വേണമെങ്കില്‍ വന്നു വിളിച്ചോണ്ട് പൊയ്ക്കോ എന്നാ അവര് പറഞ്ഞത് ... എടാ ഒന്ന് പോയി വാടാ പ്ലീസ് .." ചേച്ചി അപേക്ഷിച്ചു.

"സ്കൂളിന്റെ നമ്പര്‍ ഉണ്ടോ ചേച്ചീ ഞാന്‍ ഒന്ന് സംസാരിച്ചു നോക്കട്ടെ " 

ചേച്ചിയുടെ വീട്ടില്‍ നിന്നും ഞാന്‍ ഫോണ്‍ ചെയ്തു .

അറ്റന്‍ഡ് ചെയ്ത ഉടനെ ഒരു സ്ത്രീ ശബ്ദം " ഓം നമശിവായ" 

ഞാന്‍ പറഞ്ഞു "സോറി നമ്പര്‍ തെറ്റിപ്പോയി "

കട്ട്‌ ചെയ്തിട്ട് ചേച്ചിയോട് പറഞ്ഞു " ചേച്ചിയെതാ നമ്പര്‍ തന്നത്? ഇതേതോ അമ്പലത്തിലെക്കാ പോയത്  നമശിവായ പറയുന്നു !"

ചേച്ചി ചിരിച്ചുകൊണ്ട് പറഞ്ഞു " എടാ അത് തന്നെയാ നമ്പര്‍ അവിടെ ഫോണ്‍ വിളിച്ചാ ആദ്യം നമശിവായ പറയും "

ചമ്മല്‍ മറച്ചു കൊണ്ടു ഞാന്‍ വീണ്ടും ഡയല്‍ ചെയ്തു .

" ഓം നമശിവായ" 

ഞാനും പറഞ്ഞു " ഓം നമശിവായ, അമൃത സ്കൂള്‍ അല്ലെ ?"

"അതെ"

" മാഡം , ഇത് കാഞ്ഞിലേരിയില്‍ നിന്നു , 1st D യില്‍ പഠിക്കുന്ന അതുലിന്റെ അച്ഛനാണ് വിളിക്കുന്നത്‌ സ്കൂള്‍ ബസ്സ്‌ ഇതുവരെ വന്നില്ല "

   അതുലിന്റെ അമ്മയില്‍ ഉണ്ടായ ഭാവമാറ്റം ഞാന്‍ കണ്ടില്ലെന്നു നടിച്ചു.

" ആ ഞാന്‍ എല്ലാവരെയും വിളിച്ചു പറഞ്ഞതാണല്ലോ , കുട്ടികളെ വന്നു കൊണ്ടുപോകാന്‍ ... അവിടെ വഴിയില്‍ എന്തോ പ്രശ്നം ഉണ്ടെന്നു കേള്‍ക്കുന്നു അതുകൊണ്ട് സ്കൂള്‍ ബസ്സ്‌ വരില്ല "

"മാഡം , പ്രശ്നം രാവിലെ ഉണ്ടായിരുന്നു ഇപ്പൊ എല്ലാം ശാന്തം ആണ് . വാഹനങ്ങള്‍ ഒക്കെ ഓടുന്നുണ്ട് , മറ്റു സ്കൂളുകളില്‍ നിന്നുള്ള വണ്ടികളൊക്കെ വന്നിരുന്നു "

"അതൊന്നും എനിക്കറിയില്ല , ഇന്ന്  സ്കൂള്‍ ബസ്സ്‌ വരില്ല " മാഡം മറുപടിക്ക് കാത്തുനില്‍കാതെ ഫോണ്‍ കട്ട്‌ ചെയ്തു .

എനിക്ക് മുഖമടച്ചു ഒരു അടികിട്ടിയ അനുഭവം ....! എന്റെ മുഖത്തെ ഭാവമാറ്റം ചേച്ചിയും സുഹൃത്തും ശ്രദ്ധിച്ചു കാണണം , ആരും ഒന്നും മിണ്ടിയില്ല .

ഞാന്‍ റീ ഡയല്‍ ചെയ്തു .

വീണ്ടും ഓം നമശിവായ കേട്ടു .

എന്റെ മറുപടി " ഓം നമശിവായ പറഞ്ഞ നാവുകൊണ്ട് വെറുതെ വേറെയൊന്നും പറയിപ്പിക്കരുത് , രാവിലെ കുട്ടികളെ സ്കൂളിലേക്ക് കൊണ്ടുപോയിട്ടുന്ടെങ്കില്‍ തിരിച്ച് കൊണ്ടുവരേണ്ട ഉത്തരവാദിത്വം നിങ്ങള്‍ക്കുണ്ട്‌ . "

" അത് പറയാന്‍ നിങ്ങള്‍ ആരാ " മാഡം ഇടയ്ക്ക് കയറി .

ആ ഇടയ്ക്ക് കയറിയുള്ള ചോദ്യം എന്നിലെ പ്രശ്നക്കാരനെ ഉണര്‍ത്തി എന്ന് തോന്നുന്നു - എന്റെ ചുണ്ടില്‍ ഒരു ബീഡി എരിയുന്നതായും പുക അവരുടെ മുഖത്തേക്ക് ഊതുന്നതായും ഒരു രംഗം എന്റെ മനസ്സില്‍ തെളിഞ്ഞു 

എന്റെ മറുപടി ഒരു അലര്‍ച്ചയായിരുന്നു " ആരാണെന്ന് നിങ്ങള്‍ക്കു അറിയില്ല ...!!! വെറുതെ എന്നെക്കൊണ്ട് പറയിപ്പിക്കരുത് "

അവര്‍ ഫോണ്‍ കട്ട്‌ ചെയ്തു .

അര മണിക്കൂറിനുള്ളില്‍ സ്കൂള്‍ ബസ്സ്‌ എത്തി .

വന്ന ഉടനെ അതുല്‍ ക്ലാസ്സ്‌ ഡയറി എടുത്തു അമ്മയ്ക്ക് നേരെ നീട്ടി. 

അത് വായിച്ചിട്ട് ചേച്ചി എന്റെ മുഖത്ത് നോക്കി ... എന്താ ഇങ്ങനെ ഒരു ഭാവം ? ഞാന്‍ സംശയിച്ചു . ഞാന്‍ അത് വാങ്ങി നോക്കി.

അതില്‍ ഇങ്ങനെ എഴുതിയിട്ടുണ്ടായിരുന്നു  - Athul's parents should meet the HM tomorrow.

ഞാന്‍ പിന്നെ അവിടെ നിന്നൊന്നുമില്ല. എന്നെക്കൊണ്ട് ഇത്രയൊക്കെയേ പറ്റുള്ളൂ എന്ന് മനസ്സില്‍ പറഞ്ഞു മെല്ലെ അവിടെ നിന്നു മുങ്ങി.

ഇനി ആ പാനീയം കിട്ടുമോ എന്തോ ...???